Guía actualizada o 11 de xullo de 2026
Que vai en cada sobre
Nunha licitación pública a oferta pártese en sobres para que a mesa valore o subxectivo SEN coñecer o prezo. Por iso o erro que máis ofertas exclúe non é de contido: é poñer algo no sobre equivocado.
Sobre A: documentación administrativa
No procedemento aberto, o DEUC (Documento europeo único de contratación) ou a declaración responsable que pida o prego, e os anexos que este esixa: compromiso de UTE, integración de solvencia con outras empresas, adscrición de medios, subcontratación, sometemento aos xulgados españois se es estranxeiro. Aquí NON vai nada que permita deducir o teu prezo nin o que se valora por fórmula (art. 139.2 e 157.2 LCSP).
Sobre B: criterios de xuízo de valor
A memoria técnica e o que a mesa valora co seu criterio: metodoloxía, organización, plan de traballo. Respecta o límite de páxinas, o tamaño de letra e o formato que fixe o prego: se o prego o sanciona, pasarse exclúe. E nin un euro, nin unha porcentaxe de baixa, nin ningún dato dos que puntúan por fórmula, aínda que sexa de pasada.
Sobre C: criterios por fórmula
A proposición económica segundo o modelo do prego, co IVE á parte, e o demais que puntúa automaticamente: prazos de entrega, anos de garantía, certificacións, medios adicionais. Comproba que non superas o orzamento base (con IVE fronte a con IVE, sen IVE fronte a sen IVE) nin o teito de ningunha partida.
Cando hai tres, dous ou un sobre
Tres no aberto con criterios dos dous tipos; dous se só hai criterios por fórmula (A e C). No aberto simplificado (art. 159) non hai DEUC: a declaración vai no modelo de oferta e é obrigatorio estar inscrito no ROLECE ao acabar o prazo. No simplificado abreviado (art. 159.6: obras de menos de 80.000 € e subministracións ou servizos de menos de 60.000 €) hai un só sobre.
Revísao antes de subilo
O Sobre listo de AIM PAPYR revisa os tres sobres á vez: busca importes e criterios por fórmula fóra do seu sitio, conta as páxinas do PDF que vas subir, mide a letra, compara a túa oferta co orzamento, comproba as sinaturas e dicíche que resolución dun tribunal avala cada aviso. De balde, ao instante e sen gardar nada.
Preguntas frecuentes
Que pasa se poño o prezo no sobre B?
Pode excluírte: o tribunal central confirmouno varias veces (TACRC 1483/2022, 81/2026). A exclusión non é automática se a información non permite coñecer a oferta, pero é un risco que non merece a pena.
O sobre A pode levar importes?
Si, os da solvencia: volume de negocios, seguros, garantías. O que non pode levar é nada da túa oferta económica.
Que é o ROLECE e cando o necesito?
O rexistro oficial de licitadores do Estado. No aberto simplificado é obrigatorio estar inscrito (ou telo pedido) antes de que remate o prazo; non se pode emendar despois.